قصيده الغربه

موضوع: قصيده الغربه الإثنين أبريل 13, 2009 11:27 pm

يبو كصايب ذهب والخلك جرفين
دخيلك ياوطن من حبك دخيل
ندم آدم ندمنه بيوم عفناك
وبالغربة ندفن مليون هابيل
عفناك بوكت بي صعبة تنعاف
ويمر حزنك علينه بهدوة الليل
عراق شكد سمح ويه اليعيلون
وأنت المارضيت بناسك تعيل
صبر أيوب صبرك عالملمات
وجلد عالموزمات وخلكك طويل
كلش تختلف عن غيرك هواي
حتى دموعك بخدك قناديل
وحتى الحزن بيك نشوفه ضحكات
وجوادر حزنك بروحي شناشيل
كبل لاتنولد أنت إسمك إعراق
وكبل لانعقل بحبك مخابيل
عراقيين كلش من الكماط
وسمار خدودنه بلون المواويل
بعدني إشتاق إلك رغم المسافات
ودمعتي شما أذكرك نهر وتسيل
بجينه بفركتك حد شهكت الموت
وهذن دموعنه بخد المراسيل
وطن غيرك أبد ماتقره العيون
نقراهن وِطن وبليه تأويل
بس إسمك بقى وسط الجوازات
وبس إلخاطرك تنزل دمعتي
عبرت أول جرح عنوانه الحدود
وعبرت وعبرت بصدري عبرتي
ومشيت ونار ذلة تحز بالجدام
وشلت جثة أحلامي بنص جنطتي
نطيتك ظهري من عبرت الحدود
وصبح وجهي ظهر والله بغربتي
أفكر بيك وأصفن خاطر أنساك
وأرد إردود وألكاك بصفنتي
وأحرك ذكرياتي بنار الأشواك
وأحس نار الهجر تلب مهجتي
باجر على بابك أركع إردود
ومن ترابك تعفر جبهتي
عراق شلون عدنه كلوب تنساك
ونحاول ياوطن نجرح حساسك
وأنت المكسرت خاطرنه فد يوم
والكل من عطش مديت طاسك
ياحنة الفاو ودفو المشخاب
شمعتك دم بجت من ذبل ياسك
صبغنه أرواحنه بلون الدللول
وشربنه المرجلة إمن شفاه كاسك
خجل ثوب الكرامة من اليلبسون
وبس أنت أعله كدك وبقياسك
ورغم صغر الخريطة البين الحدود
بس تبقه الجبير بعين ناسك
بيك أنت هبطك آدم وجبريل
وأحنه بدم علي شيدنه ساسك
ياأطهر وطن ياأطهر تراب
بيك حسين طاح ونحره باسك
عراق أنت وأبد مادنكت يوم
لأن كبة علي خوذة أعله راسك

» قصيده الغربه
» قصيده رائعه
» قصيده جميله وروعه( أم العيون النعاسي)
» قصيده : تعبت والدنيا تريح .... رائعه
» < كيف تكتب قصيده شعريه > ؟؟؟؟